Dende a Asociación Galega de Profesionais da Xestión Cultural (AGPXC) presentamos o banco de boas prácticas para a xestión cultural, coa finalidade de poñer a disposición de xestoras e xestores culturais, cargos públicos con responsabilidades en políticas culturais e artistas, entre outros perfís, todo un escaparate de proxectos e exemplos inspiradores para poder traballar máis e mellor no ámbito cultural.

Xa está accesible en

boaspracticas.xestoresculturais.gal

O Banco Galego de Boas prácticas en Xestión cultural é o resultado dun proceso de investigación de dous anos no que foron consultadas máis de 400 persoas do sector da xestión cultural en Galicia. Deste proceso saeu a escolla de 100 proxectos iniciais, aínda que o banco está aberto e seguirase completando a través dos criterios cualitativos que avalía: calidade, impacto integral no territorio, sostibilidade ou inclusión de valores transformadores.

O resultado é en primeiro lugar un “escaparate” do moito e bo que se fai no país en xestión cultural. Buscamos ademais coñercernos e recoñecernos entre nós, por eso a AGPXC visitará os proxectos a partir do ano que ven para certificalos en persoa e para organizar xornadas de intercambio de coñecementos. Queremos coñecer de preto o saber facer das persoas xestoras que desenvolven iniciativas de tanto éxito. E parécenos que este PUNTO DE ENCONTRO pode ser unha ferramenta de artellamento da profesión, que é un dos obxectivos principais desta asociación.

Este proxecto estivo financiado polo Ministerio de Cultura e a vicepresidencia da Deputación da Coruña. Coordinado por Sergio Lago e traballado por Adriana Castro e Nela Fraga, entre outras persoas colaboradoras.

Son 100 proxectos culturais seleccionados en base a criterios de innovación (emprego de estratexias novas e creativas de solución a problemas comúns), efectividade nos seus resultados (nivel de éxito, ben nos resultados, ben nos procedementos para a solución dos problemas aos que vai dirixida)  exemplaridade inspiradora (o seu efecto multiplicador e que poida servir como ferramenta de capacitación) e transferibilidade (que sexa aplicable a outros contextos)